Žemaitėška rašta metā: „Rūtelės“ darželėnokā sokvėitė susiedus

2024 metā – Žemaitiu rašta metā. Mėnavuodamė tōn, lopšelė-darželė „Rūtelė“ vakā ė anū auklėtuojės bėrželė 6 dėina sokvėitė vėsus sava susiedus i šuokiu švėntė „Susiedu zirzīnė“.

Kas piestė, kas važioutė, nepasėdėdžiava ė atkeliava nuognē dėdelis būrīs svetiū: mažėijē šokiejē ėš lopšieliu-daržieliu „Nīkštoks“, „Raudonkeporātė“, „Vīturielis“, „Pasaka“, „Saulutė“.

Ė vakutelē, ė paugėn rokavuos tik žemaitėškā. Vo smagē soktė ratelius ė dainioutė anīms pagelbiejė Plungės Senamiestė mokīklas polkliuora ansamblis „Kėilelė“ ė anū vaduovė Laima Duomarkienė.

Bova dėdelē smagē! „Rūtelė“ šėrdingā visīms diekavuo! Skėrstontėis nomėj, ne vėins rokava, ka  galietomem tēp ė kėtās metās susėētė. „Rūtelė“ īsėdiejė tōn i galva ė žad pamislītė. Vo rasiet ta „Susiedu zirzīnė“ taps tradiciniu susėbiegėmu? Būtom feinē!

„Rūtelės“ informacėjė